Naxçıvan Muxtar Respublikası Dövlət Arxiv İdarəsinin yaradılmasının 99-cu ildönümü münasibətilə tədbir keçirilib.

     Tədbir iştirakçıları əvvəlcə Ümummilli Lider Heydər Əliyevin Naxçıvan şəhərindəki abidəsini ziyarət edərək, önünə gül dəstələri düzüblər. Daha sonra Heydər Əliyev Muzeyində Ümummilli Liderin həyat və fəaliyyətini əks etdirən eksponatlarla tanış olublar.

     Naxçıvan Muxtar Respublikasının Dövlət Arxiv İdarəsində davam edən tədbiri giriş sözü ilə açan idarə rəisi Mehman Məmmədov və Naxçıvan Muxtar Respublikası Nazirlər Kabineti Aparatının Humanitar və sosial məsələlər şöbəsinin müdiri Tarverdi Məmmədov, muxtar respublikada arxiv sahəsində çalışan əməkdaşları təbrik ediblər. Onlar arxivçilərin gördüyü işləri yüksək qiymətləndirərək təşəkkürlərini bildiriblər.

     Tədbirdə Naxçıvan Muxtar Respublikası Dövlət Arxivinin əməkdaşları müxtəlif mövzularda çıxış ediblər. Arxiv fond sənədlərindən istifadə edilməsi və publikasiya şöbəsinin aparıcı arxeoqrafı Aygün Həmzəyeva “Heydər Əliyev və Azərbaycanda arxiv işi” mövzusunda çıxış edərək, Ulu Öndərin arxiv sahəsinin inkişafına verdiyi töhfələrdən danışıb.

     “Naxçıvanda arxiv quruculuğu” mövzusunda çıxış edən Arxiv fondlarının və kino-foto sənədlərin mühafizəsi şöbəsinin müdiri Türkay Həsənova, 1925-ci ildən günümüzə qədər arxiv idarələrinin fəaliyyəti və tarixi əhəmiyyəti barədə məlumat verib. Şahbuz Rayon Dövlət Arxivinin müdiri Elcan Əlizadə isə “Cəmiyyətin sosial-mədəni inkişafında arxivin rolu” mövzusunda çıxış edib.

     Tədbirin sonunda arxiv sahəsindəki məsuliyyətli və nümunəvi xidmətlərinə görə bir qrup əməkdaş “Fəxri Fərman” və “Təşəkkürnamə” ilə təltif olunub.